“Yaxşı hazırlıq keçirik. Nə qədər vacib oyun olduğunu yaxşı anlayırıq”. Apasport.az saytının məlumatına görə, bu sözləri Azərbaycan millisinin müdafiəçisi Maksim Medvedev söyləyib.

O, bu gün keçirilən mətbuat konfransında DÇ-2018-in seçmə mərhələsində Norveçlə keçiriləcək qarşılaşma ilə bağlı bunları deyib: “San-Marino üzərində qələbədən sonra əhvalımız yaxşıdı. Başa düşürük ki, Norveç San-Marino deyil. Amma biz də çalışacağıq öz yolumuzu davam etdirək, azarkeşləri sevindirək”.

Medvedev müdafiənin mərkəzində oynamağının onun üçün problem olmadığını bildirib: “Millinin son 4 oyununda müdafiənin mərkəzində çıxış etmişəm. Həm Rəşad, həm də Bədavi ilə yanaşı oynayanda rahat oluram. Bu dəfə Rəşadın yanında olmağım o demək deyil ki, orda özümü pis hiss edəcəm. Sadəcə, funksiyalarım fərqli olacaq. Milli öz oyununu qura bilsə, müdafiənin mərkəzində oynamağımın heç bir çətinliyi olmayacaq”.

Qeyd edək ki, sabah Bakı Olimpiya Stadionunda keçiriləcək Azərbaycan – Norveç oyunu saat 20:00-da başlayacaq.