“Müdafiədəki oyunumuz kifayət qədər yüksək səviyyədədi. Düzdü, üzərində işləməli, təkmilləşdirməli olduğumuz məqamlar var. Lakin ümumilikdə çox ciddi səviyyədədi. Bu oyunda “18-lik”də yer almayan Rafael Santos bizim üçün önəmli oyunçudur. Ona güvənirik. Əminəm ki, Santos bizə hələ çox kömək edəcək”. Apasport.az saytının məlumatına görə, bu sözləri Roman Qriqorçuk deyib.

Topaz Premyer Liqasının V turunda öz meydanında AZAL-a qalib gələn “qırmızı-qaralar”ın çalışdırıcısı klubun rəsmi saytına açıqlama verib.

Ukraynalı mütəxəssis qələbəni belə şərh edib: “Cinah müdafiəçilərinin mövqeyini dəyişməsi xüsusi atılan addım deyildi. Sadəcə oyun epizodundan belə alındı. Petar Franyiçin oynamaması belə qərar verməyimizlə bağlıdır. O oynasaydı, başqası kənarda qalacaqdı. Bu oyunçunun “Neftçi” ilə qarşılaşmada səhvlər etdiyini düşünmürəm. Qismət Alıyev istədiyimiz kimi oynamasa da, gənc oyunçu ilə bağlı qərar vermək yox, onların belə çıxışına imkan yaratmaq, səbr eləmək lazımdır. Onu buna görə əvəzlədik. Roman Hüseynov isə kifayət qədər yaxşı oynadı. Onun qol sevincini mənimlə bölüşdüyü anda hər ikimiz eyni hissləri keçirdik. Mən gənc oyunçunun qoluna heç də ondan az sevinmədim”.

Təcrübəli çalışdırıcı meydana çıxdıqları bütün platformalarda yalnız qələbəni hədəflədiklərini xüsusi vurğulayıb: “Biz turnirlər arasında fərq qoymuruq ki, çempionat və ya UEFA Avropa Liqası vacibdir. Qrup mərhələsinin hər matçı bir hadisədir. Azarkeşlər düşünür ki, adi matçlardır və “Qəbələ” “Maynz”a, “Sent-Etyen”ə qalib gəlməlidir. Lakin öncədən fikirləşmək lazımdır ki, onlar top-çempionatları təmsil edir. Bu çempionatlarda 30-cu olan komanda belə səviyyəli yarışdan gəlib. Həmin komandaların hər biri ilə matçlar böyük hadisədir. Bu turnirin vacib olmadığını demək olmaz. Elə çempionat da hər bir komanda üçün önəmlidir. Biz bütün turnirlərdə - həm çempionat, həm avrokubok, həm ölkə kubokunda keçirdiyimiz matçlara məsuliyyətlə və qələbə qazanmaq istəyi ilə yanaşırıq. İndidən “Maynz”dan danışmaq tezdir. Bunadək iki çempionat matçımız var. İlk növbədə “Sumqayıt”ı düşünməliyik”.