Topaz Premyer Liqasının VI turunda AZAL “İnter”i qəbul edib. Apasport.az saytının məlumatına görə, bu oyun yubiley qolu və bir seriyanın qırılması ilə əlamətdar olub.

Belə ki, 3:1 hesabı ilə “bankirlər”in xeyrinə başa çatan oyunun 54-cü dəqiqəsində Nuqzar Kvirtiyanın vurduğu cavab qolu iki komanda arasında vurulmuş 50-ci qol olub.

Gürcü oyunçu fərqlənməklə həm də komandasının iki rəqib arasındakı görüşlərdə ardıcıl 5 oyunluq qolsuzluq seriyasına da son qoyub.

AZAL-ın “İnter”ə qarşı davam edən 11 oyunluq qələbəsizlik seriyası isə bir matç da uzanaraq 12 olub.