[b]Doqquzundan altısı və ya Prosineçki "Bakı"ya tərəf baxmır [/b]

17.02.2015 - 00:01

Azərbaycan millisinin Antalya toplanışı üçün açıqlanan heyətində 3 yeni sima var. Apasport.az saytının məlumatına görə, Coşqun Diniyev, Elvin Camalov və Anton Krivotçuk karyeralarında ilk dəfə əsas yığmasına çağırılıblar.

Düzdü, Robert Prosineçkinin seçimini üzərində dayandırdığı 24 futbolçudan doqquzu milli formada rəsmi matça çıxmasa da, altısı müxtəlif vaxtlarda toplanışa dəvət alıb.

Amma Məhəmməd Mirzəbəyov, Məhəmməd Qurbanov, Orxan Əliyev, Namiq Ələsgərov, Rəşad Eyyubov və Emil Balayev yığmaya çağırılsalar da, meydana çıxmaq onlara nəsib olmamışdı. Amma onların heç biri Türkiyədə də debüt edə bilməyəcək. Ona görə ki, Antalya toplanışındakı yeganə qarşılaşma Ukrayna klubu “Şaxtyor”a qarşı baş tutacaq. Klubla görüş isə rəsmi matç kimi hesaba alınmır.

Antalyaya yollanacaq heyətdə ölkə xaricində çıxış edən futbolçulardan yalnız Balayev dəvət alıb. Digərləri isə öz klublarına lazım olduğundan toplanışda iştirak etməyəcək. Daha bir futbolçu – Krivotçukun klubsuz olduğunu nəzərə alsaq, Premyer Liqada çıxış edən 22 oyunçu toplanışa qatılacaq.

Krivotçuka gəlincə, əvvəllər ölkəmizin U-17 yığmasına da çağırılan ukraynalı futbolçunun son klubu Kiyev “Zvezda”sı olub. 1998-ci il təvəllüdlü oyunçu hazırda klubsuz olsa da, Prosineçkinin onu məhz U-17-nin heyətində bəyəndiyini ehtimal etmək olar. Müdafiədə çıxış edən gənc istedad yığmamızın arxa xəttini gücləndirməlidi.

AZAL-la təxirə salınmış matçını keçirəcək “Neftçi”nin üzvləri hazırlığa yollanmadığından toplanışda Premyer Liqanın digər 6 klubunun oyunçuları iştirak edəcək. “Qarabağ”la “İnter” hərəsi 6, “Qəbələ” 4, “Sumqayıt” 3, “Xəzər Lənkəran” 2, “Simurq” 1 təmsilçisini Antalya hazırlıqlarına göndərəcək. Prosineçki turnir cədvəlində sonuncu olan “Bakı”nın futbolçularına ehtiyac duymayıb.

futbolçu	klubu	Millidə oyun	Millidə qol
Rəşad Sadıqov	Qarabağ	94	4
Vüqar Nadirov	Qarabağ	57	4
Cavid Hüseynov	Qəbələ	45	-
Ruslan Abışov	Qəbələ	44	4
Rahid Əmirquliyev	Xəzər Lənkəran	40	1
Elvin Məmmədov	İnter	32	7
Maksim Medvedev	Qarabağ	28	-
Rəşad Sadiqov	Qəbələ	23	-
Əfran İsmaylov	İnter	19	1
Bədavi Hüseynov	Qarabağ	16	-
Qara Qarayev	Qarabağ	13	-
Səlahət Ağayev	İnter	7	-2
Andriy Popoviç	Sumqayıt	2	-2
Arif Daşdəmirov	İnter	2	-
Ağabala Ramazanov	Xəzər Lənkəran	1	-
Namik Ələsgərov	Qarabağ	-	-
Elvin Camalov	Qəbələ	-	-
Maqomed Mirzəbəyov	İnter	-	-
Coşqun Diniyev	İnter	-	-
Orxan Əliyev	Sumqayıt	-	-
Məhəmməd Qurbanov	Sumqayıt	-	-
Rəşad Eyyubov	Simurq	-	-
Emil Balayev	Aynraxt (Frankfurt, Almaniya)	-	-
Anton Krivotçuk	klubsuz	-	-