[b]Millimiz Bakıda qol vura biləcəkmi?[/b]

16.11.2015 - 11:56

Sabah 21 yaşadək futbolçular arasında AVRO-2017-nin seçmə mərhələsinin VII qrupunda növbəti oyunlar keçiriləcək. Apasport.az saytının məlumatına görə, Azərbaycan millisi Rusiya ilə görüşəcək.

Bu, yığmamızın seçmə mərhələdə 7-ci oyunu olacaq. İlk matçında Farer adaları səfərindən 3 xalla ayrılan komandamız üzləşdiyi 5 oyunluq məğlubiyyət seriyasına son qoymağa çalışacaq.

Turnir cədvəlində yalnız ada təmsilçisini qabaqlayan Yaşar Vahabzadənin yetirmələri qalib gələrək, 1 pillə irəliləmək imkanına malikdi. Çünki şimal qonşularımız da uğursuz start götürdüyü tsikldə cəmi 3 xal toplayıb.

Vahabzadənin komandası ilk ev xalına və qoluna bu matçda nail olmaq istəyir. Belə ki, komandamız Avstriya (0:2), Almaniya (0:3) və Finlandiya (0:1) ilə Bakıdakı görüşlərdə quru hesablı məğlubiyyət alıb.

Dmitri Xomuxanın baş məşqçisi olduğu Rusiya yığması üçün də Bakıdakı görüş vacibdi. Cari seçmə mərhələdə səfərdə xala həsrət qalan şimallılar Finlandiya (0:2) və Avstriyadakı (3:4) kimi ölkəmizdən də xal itkisi ilə üzləşsə, liderlərdən uzaq düşəcək. Bu isə komandanın final mərhələsi şanslarına mənfi təsir edəcək.

Bayıl stadionunda keçiriləcək qarşılaşma iki azərbaycanlı futbolçunun millimizə qarşı oynaması ilə də əlamətdar olacaq. Rusiya yığmasının formasını geyinən Ramil Şeydayev və Ayaz Quliyev də Xomuxanın Bakıya gətirdiyi heyətdə yer alıblar.

Qeyd edək ki, qrupumuzda keçiriləcək digər oyunda liderlər - Almaniya və Avstriya milliləri üz-üzə gələcək.

21 yaşadək futbolçular arasında AVRO-2017-nin seçmə mərhələsi

VII qrup

17 noyabr

17:00. Azərbaycan – Rusiya

Baş hakim: Eytan Şmuelevits

Baş hakimin köməkçiləri: Nissan Davidi, Roy Hassan

Dördüncü hakim: Ziv Adler (hamısı İsrail)

UEFA nümayəndəsi: Sergey Lisnik (Moldova)

Hakim-inspektor: Rusmir Mrkoviç (Bosniya və Herseqovina)

Bakı. Bayıl stadionu