2017-ci ildə keçiriləcək kişi voleybolçular arasında Avropa çempionatının seçmə mərhələsinin püşkü atılıb. Apasport.az saytının məlumatına görə, bir müddət analoji yarışdan kənar qaldıqdan sonra 2 il əvvəl Avropa səhnəsində qayıdan Azərbaycan millisi də bu dəfə də mübarizəyə qatılacaq.
Meydan sahibi olan Polşa, həmçinin Fransa, Sloveniya, İtaliya, Bolqarıstan, Rusiya və Serbiya seçmə mərhələdə iştirak etməyəcək. Digər 31 komanda 3 seçmə mərhələdə çıxış edəcək.
Azərbaycan da daxil olmaqla, 12 yığma 1-ci raundda 3 qrupda qüvvəsini sınayacaq. Qrup qalibləri, həmçinin iki ən yaxşı qrup ikincisi mərhələ adlayan 5 komandanı təşkil edəcək. Bu mərhələnin oyunları 2016-cı il mayın 19-22-də baş tutacaq.
Yığmamız İsveç, İsveçrə və Gürcüstanla görüşəcək. Qrupun oyunlarına kimin ev sahibliyi edəcəyi hələ dəqiqləşməyib.
Mübarizəyə 2-ci seçmə mərhələdən başlayan 19 komanda və əvvəlki raundun 5 xoşbəxti 6 qrupa bölünəcək. Onlar gələn il sentyabrın 15-18 və 22-25-də iki dövrədə qalibləri müəyyənləşdirəcək.
Azərbaycan millisi 1-ci mərhələni qalib kimi başa vursa, Finlandiya, Portuqaliya, Danimarka ilə üz-üzə gələcək.
1-ci mərhələ
1-ci qrup
İsveç, Azərbaycan, İsveçrə, Gürcüstan
2-ci qrup
Avstriya, Lüksemburq, Moldova, Litva
3-cü qrup
İsrail, Macarıstan, Norveç, İngiltərə
2-ci mərhələ
A qrupu
Almaniya, İspaniya, Monteneqro, 1-ci mərhələnin qrup ikinciləri arasında 2-ci nəticə
B qrupu
Finlandiya, Portuqaliya, Danimarka, 1-ci qrupun qalibi
C qrupu
Belçika, Yunanıstan, Ukrayna, 1-ci mərhələnin ən yaxşı qrup ikincisi
D qrupu
Slovakiya, Latviya, Xorvatiya, 3-cü qrupun qalibi
E qrupu
Hollandiya, Türkiyə, Belarus, 2-ci qrupun qalibi
F qrupu
Çexiya, Estoniya, Makedoniya, Rumıniya
2-ci seçmə mərhələnin 6 qalibi Polşadakı final mərhələsinə yüksələcək. Həmin turnirə son 3 vəsiqənin sahibi isə 3-cü seçmə mərhələsində bəlli olacaq.
Bu raundda 2-ci seçmə mərhələnin qrup ikinciləri üz-üzə gələcək. 6 komanda 2017-ci il mayın 16-17 və 20-21-də görüşəcək.
3-cü seçmə mərhələ
E2 – B2
A2 – C2
D2 – F2