Azərbaycan yığmasının hücumçusu Ağabala Ramazanovun apasport.az saytına müsahibəsi
- Avropa çempionatının seçmə mərhələsinin Xorvatiya ilə görüşündə əsas yığmada debüt etdiniz. Bu barədə nə deyə bilərsiniz?
- Oyuna istəkli çıxmışdım. Amma 10 dəqiqə oynadıqdan sonra zədələndim. İndiyədək karyeramda belə uğursuzluqla üzləşməmişəm. Deməli, qismət belə imiş. Görünür, qismətimdə oynamaq yox, zədə varmış.
- Oyun ərzində bunu dəqiqləşdirmək mümkün olmadı. Qara Qarayev zədələndiyi üçün onu əvəzlədiniz, yoxsa?
- Yox. Bu, məcburi əvəzetmə deyildi. Qaranı baş məşqçi dəyişdi. Hesabda geri olduğumuz üçün daha çox hücumameylli oynamalı idik.
- Zədəniz nə yerdədi?
- Deyəsən, arxa əzələm cırılıb. Bakıda MRT müayinəsindən keçdikdən sonra zədəmin ciddiliyinə aydınlıq gələcək. Xorvatiyada MRT-dən keçməyə imkan olmadı, gec idi. Yəqin ki, ən azı 1 ay oynaya bilməyəcəyəm.
- 0:6 hesabı haqqında nə deyə bilərsiniz?
- Xorvatiya ilə matç haqqında heç nə danışmaq istəmirəm. Konkret olaraq oyunumuz alınmadı. Biabırçı şəkildə məğlub olduq.
- Məğlubiyyətin səbəbini nədə görürsünüz? Bəlkə taktika düzgün seçilməmişdi...
- Əslində, görüşə 4 müdafiəçi ilə başlamışdıq. Sonradan matçın gedişinə uyğun olaraq, 5 müdafiəçi ilə oynamalı olduq. Bunu taktika ilə bağlamaq düzgün deyil. Uduzmuşuqsa, hamımız uduzmuşuq. Öz səhvimizdən yenilmişik.
- Berti Foqts mətbuat konfransında məğlubiyyətdə günahı futbolçularda görüb. Siz də bununla razılaşırsınız?
- (gülür) Elə bilirsə, qoy elə olsun. Nə bilim, vallah...
Səbuhi TOFİQOĞLU
Oxşar xəbərlər
Ana səhifə
Bütün xəbərlər
Hesabım