Avropa Liqasının I təsnifat mərhələsində Bakı “İnter”inin ilk oyununu idarə edəcək xorvatiyalı Ante Vuçemiloviç təmsilçimiz üçün uğursuz hakimdir. Apasport.az saytının məlumatına görə, 17 gün əvvəl 40 yaşını qeyd edən referi 2007-ci ildən FİFA dərəcəsi alıb.
UEFA-nın hakimlər üçün 2-ci kateqoriyasında olan Vuçemiloviç 7,5 il ərzində avrokubokların təsnifat mərhələlərində, yığmaların seçmə oyunlarında 20-dən artıq qarşılaşmada fit çalıb.
Bakılıların iyulun 3-də Moldovada yerli “Tiraspol”la keçirəcəyi görüşün hakiminin yolları əvvəl də “bankirlər”lə kəsişib. 2009-cu ilin yayında Kaxaber Sxadadzenin “İnter”dəki debütünün korlanmasında da xorvatiyalı iş başında olub.
Həmin vaxt Avropa Liqasının I təsnifat mərhələsinin Slovakiyadakı ilk oyununda 1:2 hesabı ilə uduzan “bankirlər” Trnava “Spartak”ını Bakıda yenməli idi. Lakin uğursuz hakim Sxadadze ilə ilk ev oyununda da məğlubiyyət qeydə aldı – 1:3.
Həmin matçda bakılılar Valter Quqlemonun qolu ilə hesabı açsa da, sonradan 3 top buraxmışdı. Hətta Vuçemiloviç 59-cu dəqiqədə qonaqları azlıqda qoysa da, bundan yararlanmaq mümkün olmamışdı. 5 il əvvəlki oyuna sonradan daxil olan Asif Məmmədov və ehtiyatda qalan Georgi Lomaya yenə “İnter”in sıralarındadır.
Qeyd edək ki, “Turaspol” – “İnter” oyunu Bakı vaxtı ilə saat 22:00-da başlayacaq.
Oxşar xəbərlər
Ana səhifə
Bütün xəbərlər