“Artıq 5-ci mövsümdür ki, “Neftçi”də çıxış edirəm. Bu müddət ərzində “Neftçi”də yalnız azərbaycanlı futbolçuların kapitanlıq sarğısını daşıdığını görmüşəm. Yəni kapitanlıq sarğısı həmişə yerli futbolçularda olub”. Apasport.az saytının məlumatına görə, bunu “Neftçi”nin braziliyalı yarımmüdafiəçisi Flavinyo deyib.
Bu gün klub rəhbərliyi və məşqçilər heyətinin Türkiyənin Bolu şəhərində keçirdiyi toplantıdan sonra rəsmən “Neftçi”nin yeni kapitanı müəyyənləşib. Bundan sonra kapitan sarğısını Flavinyo daşıyacaq.
Braziliyalı futbolçu çıxış etdiyi klubun rəsmi saytına verdiyi açıqlamasında kapitan seçilməsi ilə bağlı fikirlərini bildirib: “Son illərdə bu məsuliyyətin həvalə olunduğu ilk əcnəbi futbolçuyam. Əslində, özümü heç də əcnəbi saymıram. Artıq 5-ci ildir Azərbaycandayam və özümü bu ölkənin bir vətəndaşı, bir parçası kimi hiss edirəm. Azərbaycan mənə doğmadır. Kapitanlıq sarğısını daşımaq mənə göstərilən böyük etimaddır. Bu mənim məsuliyyətimi daha da artırır. Kapitan necə olmalıdırsa, elə olmağa çalışacağam. Mənə göstərilən etimada görə klub rəhbərliyinə və məşqçilər korpusuna təşəkkürümü bildirirəm. Bu etimadı doğrultmağa çalışacağam. “Neftçi”nin kapitanı kimi Avroliqada uğurlu çıxış edib qrup mərhələsinə vəsiqə qazanaraq Azərbaycan futbolunun tarixinə düşmək istəyirəm”.
Oxşar xəbərlər
Ana səhifə
Bütün xəbərlər