AFFA-nın aşağı yaş qruplarından olan komandalar arasında təşkil etdiyi liqalarda növbəti xoşagəlməz hadisələr yaşanıb. Apasport.az saytının məlumatına görə, məşqçilərin hakimlərə qarşı yolverilməz hərəkətlərinə iki matçda təsadüf olunub. AFFA-nın İntizam Komitəsinin bu gün keçirilən yığıncağında da bu hadisələr müzakirə edilib.
U-14 Liqasında UGİM-lə (Siyəzən) matçında UGİM “Olimpik”in (Qusar) məşqçisi Mehman Səfərov “fərqlənib”. Hakimlər briqadasına və AFFA nümayəndəsinə qarşı təhqiramiz ifadələr işlədən çalışdırıcı 6 ay müddətinə yarışlardan kənarlaşdırılıb.
U-14 Liqasındakı “Təhsil” TİM (Gəncə) – “Kəpəz” (Gəncə) oyununda birincilərin baş məşqçisi Turan Əliyev hakimlər briqadasının otağına daxil olaraq, ədalət təmsilçilərini təhqir etdiyinə və oyunun rəsmi şəxsinə hədə-qorxu gəldiyinə görə 8 matçlıq cəzalanıb. “Təhsil” TİM klubunun futbolçuları və baş məşqçisi tərəfindən oyunda məcburi fasilələr yarandığına və stadionda qayda-qanun yaradılmaması ucbatından görüş başa çatdırılmayıb. Bu üzdən “Təhsil” TİM klubuna 0:3 hesablı texniki məğlubiyyət verilib.