Qazaxıstanın Astana şəhərində keçirilən “Prezident kuboku” turnirində çıxışını başa vuran 17 yaşadək futbolçulardan ibarət Azərbaycan yığması son oyun günündə rekorda imza atıb. Apasport.az saytının məlumatına görə, Qırğızıstanı darmadağın (5:0) edən millimiz təmsilçilərimizin 2008-ci ildən keçirilən yarışda ən böyük hesablı qələbəsini qazanıb.
Bunadək isə rekord 2010-cu ildə Qazaxıstanda ölkəmizi təmsil edən “Bakı”ya məxsus idi. Həmin vaxt bakılılar Çinin SUAR klubunu 4 cavabsız qolla məğlub etmişdi. Lakin paytaxt təmsilçisi həm də 0:10 hesablı məğlubiyyətlə antirekordumuzun da müəllifidir.
Ən böyük hesablı qələbəni qazanan yığmamız isə rekorddan başqa, antirekordla da diqqət çəkib. Belə ki, komandamızın tutduğu 5-ci yer millimizin Astanadakı ən zəif nəticəsidir. 2011-ci ildə 1-ci, 2012 və 2013-cü illərdə 4-cü olan futbolçularımız heç vaxt belə aşağı yuvarlanmamışdı.
Qeyd edək ki, yarışa 2009 və 2010-cu illərdə klubla qatılmışdıq. Əvvəl “Akademiya”, sonra isə “Bakı” daha pis nəticə göstərmişdi – hər ikisi 7-ci yer. Yığmamız isə özünün ən zəif göstəricisinə bu il imza atıb.
Oxşar xəbərlər
Ana səhifə
Bütün xəbərlər