Məmmədova meydana döndü, komandası mövqeyini yaxşılaşdırdı

11.04.2014 - 08:08

Qadın voleybolçular arasında Rusiya Superliqasında XXI turun oyunları keçirilib. Apasport.az saytının məlumatına görə, tur çərçivəsində Azərbaycan millisinin hücumçusu Natalya Məmmədovanın şərəfini qoruduğu “Omiçka” “Uraloçka”nın qonağı olub.

Təmsilçimizin 1 aylıq zədədən sonra qayıdışı Omsk klubu üçün uğurlu alınıb. “Omiçka” Nikolay Karpolun yetirmələrinə heç bir şans verməyib - 3:0 (25:21, 25:20, 25:19).

Bu qələbə Məmmədovanın komandasını yenidən ikinci pilləyə yüksəldib. Hazırda onların aktivində 43 xalı var.

Qeyd edək ki, “Omiçka” mövqeyini qorumaq üçün son turda əsas rəqibi Krasnodar “Dinamo”su ilə qarşılaşacaq.