Uinston Parks “Bakı”nın düşərgəsinə qayıtdı

24.01.2012 - 18:40

Yanvarın 23-də Türkiyəyə yollanan “Bakı” bu gündən hazırlıqların ikinci mərhələsinə start verib. Apasport.az saytının məlumatına görə, komandanın latviyalı baş məşqçisi Aleksandr Starkov rəhbərliyi altında bir araya gələn futbolçular taktiki və fiziki təmrinlər üzərində çalışmalarını davam etdirir. Antalyanın "Maks Royal" otelində məskunlaşan bakılılar gündə 2 məşqlə verilən tapşırıqlar üzərində işləyirlər.

Bu arada zədə səbəbindən komandadan ayrı düşən futbolçuların sağlamlığının yaxşılığa doğru dəyişməsi xəbərləri gəlir. "AZ Alkmaar"la yoxlama oyununda damarı dartılan Uinston Parks və sümük zədəsi səbəbi ilə meydanlardan kənar qalan Elvin Əliyev müalicələrini davam etdirirlər. Hər iki futbolçu son günlərdə “Acıbadem” klinikasında müalicə aldıqdan sonra düşərgəyə qayıdıblar. Parksın yaxın günlərdə intensiv məşqlərə qatılacağı təxmin edilir. Elvin isə müalicəsini daha 2 həftə ərzində davam etdirəcək.

Qeyd edək ki, “Bakı” 2-ci mərhələdə ilk yoxlama oyununu yanvarın 26-da keçirəcək. Rumıniyanın “Panduri” klubu ilə matç Bakı vaxtilə saat 19:00-da başlayacaq.

Mənbə: fcbaku.com