“Qəbələ”nin sabiq hücumçusu Yannki Kamanan karyerası ilə bağlı Fransanın “sofoot.com” saytına geniş müsahibə verib. Apasport.az saytının məlumatına görə, hazırda Fransada həvəskar “Olnoye” komandasında çıxış edən 34 yaşlı futbolçu Azərbaycan xatirələrini bölüşüb. 2012-2014-cü illərdə “Qəbələ”nin formasını geyinmiş Kamananın müsahibəsini ixtisarla sizə təqdim edirik.

- İngiltərə, Fransa və Belçika klublarındakı çıxışdan sonra İsrailə, ordan da Türkiyəyə yollandınız. Xüsusən də, “Sivasspor”a keçidiniz müəmmalı oldu...

- Düzü, Türkiyəyə gedəndə ordakı insanları istiqanlı təsəvvür etmirdim. Düşünürdüm ki, soyuqqanlı və kobud olarlar. Amma böyük sürprizlə qarşılaşdım. Türkiyə mükəmməl ölkədi, xüsusən də, Sivas şəhəri gözəldi. Əla təbiəti var. İnsanları çox mehribandı. “Sivasspor”u seçməyimin səbəbi onların çempionluğu son anda əldən vermələri və Çempionlar Liqasına vəsiqə qazanmaları idi.

- Həmin vaxt yerli dili öyrənmişdiniz?

- Bəli. Buna görə də, indi ora gedəndə çox sərbəst oluram. Düzdü, ilk vaxtlar müəyyən çətinliklər oldu. Lakin sonradan yerli dili az da olsa öyrəndim. Türkiyədə bu məsələyə ciddi baxırlar. Deyim ki, orda da fransız dilində sözləri bilən insan az deyildi.

- “Sivasspor”dan sonra “Nant”a keçib, Liqa 1-də oynaya bilərdiniz. Bu imkanı niyə dəyərləndirmədiniz?

- Mənim artıq 30 yaşım var idi. Başa düşürdüm ki, artıq Tyerri Anri kimi futbolçu olmayacam. Artıq maddi durumumu düşünmək vaxtı idi. “Nant” isə mənə az məbləğdə maaş təklif etmişdi.

- “Mersin İdmanyurdu”da qol hesabını aça bilmədiniz və Azərbaycana köçdünüz. Bunu necə izah edə bilərsiniz?

- Yaşayışımı yaxşılaşdırmaq və futbol oynamaq istəyirdim. Azərbaycanda ən yüksək məvacib alan futbolçu 500-800 min avroluq müqaviləyə qol çəkirdi. Mən də “Qəbələ” ilə anlaşdım. Mənə deyirdilər ki, orda nə işin var, geri gedəcəksən. Amma Azərbaycan çempionatı da inkişaf mərhələsinə qədəm qoymuşdu. Həmin vaxt orda yüksək liqanın səviyyəsi Fransa Liqa 2-dən bir az zəif olardı. Belə bir ölkədə oynamaq da pis olmazdı.

- Orda yaşayış necə idi?

- Yaşadığım ölkələri heç vaxt tənqid etməmişəm. Çünki yerli camaat ölkələrinin imicinə zərbə vurulduğunu düşünə bilər. Azərbaycanda həyatım pis deyildi. Bakı ölkənin paytaxtıdı və bu şəhərdə gəzmək maraqlıdı. Orda orta əsrlər abidələrinə rast gəlirsən. Azərbaycana gedəndə ehtiyatlı olmalı, nəyə görə orda olduğunu bilməlisən. O ki qaldı çıxış etdiyim kluba, yamaykalı futbolçu Deon Barton da orda oynayırdı. Komandanın baş məşqçisi isə ingilis idi.

- Yamaykalı futbolçu Azərbaycanda nə gəzir?

- Baş məşqçi Toni Adams idi. Həmin futbolçunu da Adams gətirmişdi.

- Azərbaycanda futbol sevilir?

- Azərbaycan futbolu heç də pis deyil. Böyük pullar yatırılırdı. Əksər klubların bazaları yox idi, həmçinin stadion baxımından problemləri var idi. Nizam-intizam da aşağı səviyyədə idi. Amma istedalı futbolçular var.