Topaz Premyer Liqasının XXVIII turunun qarşılaşmaları turnir cədvəlində bir sıra məqamlara aydınlıq gətirib. Apasport.az saytının məlumatına görə, sona 8 tur qalmış çempionluq şansını qoruyanların sayı 6-ya enib.
Belə ki, “Rəvan”, “Xəzər Lənkəran” və “Sumqayıt”ın ardından “Neftçi” də qızıl medallara nəzəri şanslarını itirib. “Qarabağ”dan 28 xal geri düşən paytaxt təmsilçisi bu fərqi 8 turda aradan qaldıra bilməyəcək. Bu da o deməkdi ki, “Qarabağ” ilk “altılıq”da yerini təmin edib. Növbəti turda daha iki komanda – AZAL və “Qəbələ”nin də çempionluq şansı tükənə bilər.
XXVIII turda “Sumqayıt”ın 2-ci yerə ümidləri də bitib. Samir Abasovun yetirmələri 2-ci pillədə qərarlaşan “Zirə”dən 25 xal geri qalır. Bu isə həmin fərqin aradan qaldırılmasının mümkünsüzlüyü deməkdi. “Gənclik şəhəri” təmsilçisi “Rəvan” və “Xəzər Lənkəran”ın ardından gümüş xəyalı bitən 3-cü komandadı.
Son iki pillədə qərarlaşan “Rəvan”la “Xəzər Lənkəran” isə ən yaxşı halda 7-ci yerə ümid edə bilər. Cənublular son turda uduzub, 6-cı yerə nəzəri şanslarını da itirib. Bu da o deməkdi ki, “Xəzər Lənkəran”ın avrokuboklarda oynamaq xəyalları rəsmən tükənib. Çünki “Zirə” və “İnter”in avrokuboklara buraxılmaması, “Neftçi”nin kubok qazanmaması halında da cənublular 6-cı yerlə qitə səhnəsinə çıxmayacaq.
AZAL-ın da Premyer Liqada qalacağı rəsmiləşib. “Təyyarəçilər” bütün qarşılaşmalarda uduzsa da, aşağı dəstəyə yuvarlanmayacaq. “Neftçi”, “Sumqayıt” və “Xəzər Lənkəran” isə hələ də “Rəvan”dan yuxarı pillədə qərarlaşacağını rəsmiləşdirməyib.
Oxşar xəbərlər
Ana səhifə
Bütün xəbərlər
Hesabım