Azərbaycan millisi futzal üzrə AVRO-2018-in 1/4 final mərhələsində Portuqaliya ilə qarşılaşacaq. Apasport.az saytının məlumatına görə, Sloveniyadakı qarşılaşma rəqiblər arasında 12-ci matç olacaq.

İndiyədək Azərbaycan və Portuqaliya milliləri 11 dəfə üz-üzə gəlib. Bunlardan 5-i rəsmi matçlarında, 6-sı yoxlama oyunlarında baş tutub.

Pireneylilər yığmamız üçün kabus xarakteri daşıyır. Belə ki, 11 qarşılaşmada millimiz qələbə qazana bilməyib. 8 dəfə uduzan komandamız 3 heç-heçəylə təslli tapıb. Bu bərabərliklərdən də birindən sonrakı oyunsonrası penaltilər rəqibin qələbəsi ilə başa çatıb.

Millimiz 6 yoxlama oyununun hamısı səfərdə keçirib. 3 dəfə Portuqaliyaya səfər edən komandamız hər dəfə 2 sınağa çıxıb. Bu matçlarda 5 dəfə uduzan futzalçılarımız 1 heç-heçəyə sevinib.

Digər 5 oyundan biri dünya, dördü Avropa çempionatı çərçivəsində olub. Mundialdakı son qarşılaşma elə son duel kimi tarixə düşüb. Kolumbiyadakı DÇ-2016-da yığmamızın yolunu məhz pireneylilər kəsib.

Qitə çempionatlarında iki dəfə seçmə, iki dəfə final mərhələlərində görüşmüşük. AÇ-2004-ün Portuqaliyadakı seçmə oyununda rəqib qalib gəlib. AÇ-2010-a gedən yolda Portuqaliyadakı seçmə matçında sülhə razılaşan rəqiblər Macarıstandakı yarımfinalda da görüşüb. Hər iki matç 3:3 hesabı ilə bitsə də, finalçının adının müəyyənləşdiyi matçın penaltilər seriyası Portuqaliyaya sevinc bəxş edib. 2 il sonra Xorvatiyadakı final mərhələsinin qrupunda qələbəni rəqib bayram edib.

Penaltilər seriyasını saymasaq, 8 qələbə və 3 heç-heçəsi olan pireneylilər top fərqində də üstündü. Belə ki, yığmamız 15, rəqibi az qala üçqatını 43-nü vurub.

AÇ-2004-ün seçmə oyunu

06.11.2002. AÇSO. Portuqaliya – Azərbaycan – 5:0

AÇ-2010-un seçmə oyunu

19.03.2009. AÇSO. Portuqaliya – Azərbaycan – 3:3

AÇ-2010-un final mərhələsi, yarımfinal oyunu

28.01.2010. AÇ. Azərbaycan – Portuqaliya – 3:3, pen.3:5

AÇ-2012-nin final mərhələsi, qrup oyunu

01.02.2012. AÇ. Portuqaliya – Azərbaycan – 4:1

DÇ-2016-nın final mərhələsi, 1/4 final

25.09.2016 DÇ. Azərbaycan – Portuqaliya – 2:3

Yoxlama oyunları

23.09.2003. YO. Portuqaliya – Azərbaycan – 2:1

24.09.2003. YO. Portuqaliya – Azərbaycan – 4:1

26.09.2006. YO. Portuqaliya – Azərbaycan – 8:1

27.09.2006. YO. Portuqaliya – Azərbaycan – 5:2

17.09.2013. YO. Portuqaliya  Azərbaycan – 1:1

18.09.2013. YO. Portuqaliya  Azərbaycan – 5:0

Vüqar XEYRULLAYEV

• Almaniya millisində iki ciddi itki – Musiala və Haverts sıradan çıxdı
• Serdal Adalıdan “Qalatasaray”a atmaca: "Allah onlara səbir versin"
• Burak Yılmaz Superliqaya qayıtdı – “Çorum”un yeni baş məşqçisi oldu
• Roberto Karlos Ronaldoya “10 il” verdi – “Nə vaxt istəsə, onda da gedəcək”
• Türkiyə - Fransa matçı bu kanalda - TV AFİŞA