“İnter” 366 gün məğlub olmayan “Olimpik”ə qarşı

25.04.2008 - 11:51

Cari mövsümdə ilk dəfə turun matçları üç gündə baş tutacaq ki, buna da “Standard” və “İnter” klublarının ev oyunlarını “Şəfa” stadionunda keçirməsi səbəb olub. Tura yekun vuracaq “İnter” – “Olimpik” matçı məhz mərkəzi oyun sayılır. “Olimpik” rəqiblərini qəbul etdiyi “Şəfa” stadionunda cari mövsümdə ilk dəfə qonaq qismində oynayacaq. Ölkə kubokunun finalına çıxan, həmçinin, Premyer Liqada gümüş medallar uğrunda mübarizə aparan “İnter” bir ildir, məğlub olmayan Əsgər Abdullayevin komandasını sınağa çəkəcək. Premyer Liqanın lideri çempionatda sonuncu dəfə ötən il aprelin 27-də “Xəzər-Lənkəran”la səfər matçında (2:3) uduzub. Başqa sözlə, “Olimpik” “İnter”lə görüşə 366 günlük məğlubiyyətsiz seriya ilə çıxacaq. Kubokdan kənarda qalaraq, bütün ümidlərini çempionluğa bağlayan “Neftçi” son bir ayda 4-cü dəfə “Şəfa”nın süni örtüklü meydançasında oynayacaq. Flaqmanın “Standard”la kubokun 1/4 final mərhələsində də qarşılaşdığını nəzərə alsaq, komandalar cari mövsümdə 4-cü dəfə görüşəcək. “Standard” arxada qalan matçların hamısında “Neftçi”yə məğlub olub. İki aydır qələbə üzünə həsrət qalan Qyoko Hacievskinin çalışdırdığı “Bakı”nı isə “Masallı” ilə qarşılaşma gözləyir. Makedoniyalı mütəxəssisin çempionatdakı debütü də Cənub bölgəsinin təmsilçisi ilə oyuna təsadüf etmişdi və onun komandası əzmkar qələbəyə sevinmişdi. Hələ birinci diviziondan bir-birini yaxşı tanıyan “Qəbələ” ilə “Simurq” cari mövsümdə ölkə kubokunda da münasibətlərə aydınlıq gətiriblər. Premyer Liqada qəbələliləri həmişə məğlub edən “Simurq” kubokda aldığı məğlubiyyətin əvəzini çıxmağa çalışacaq. Premyer Liqanı tərk etməyə əsas namizədlərdən hesab olunan ABN və “Gənclərbirliyi” ortabab komandalarla görüşlərdə xal ehtiyatlarını artırmaq əzmindədirlər. Sumqayıtlıların rəqibi çempionatda ilk qələbəsini qazandığı və səfərdə qalib gəldiyi “Karvan” olacaq.
Qeyd edək ki, “İnter” - “Olimpik” saat 17:00, “Standard” - “Neftçi” 18:00, qalan matçlar isə 16:00-da başlanacaq. Fərqli vaxtlara salınan “Şəfa” stadionundakı hər iki görüş AzTV ilə canlı yayımlanacaq.

26 aprel
“Masallı” – “Bakı”
Lənkəran. Olimpiya İdman Kompleksinin stadionu
İlk dövrədəki oyun – 1:2

ABN – “Qarabağ”
Bərdə. Şəhər stadionu
İlk dövrədəki oyun – 1:3

“Gənclərbirliyi” – “Karvan”
Sumqayıt. Mehdi Hüseynzadə adına şəhər stadionu
İlk dövrədəki oyun – 2:1

27 aprel
“Standard” – “Neftçi”
Bakı. “Şəfa” stadionu
İlk dövrədəki oyun – 1:3

“Qəbələ” – “Simurq”
Qəbələ. Şəhər stadionu
İlk dövrədəki oyun – 0:2

“Turan” – “Xəzər-Lənkəran”
Tovuz. Şəhər stadionu
İlk dövrədəki oyun – 0:2

28 aprel
“İnter” - “Olimpik”
Bakı. “Şəfa” stadionu
İlk dövrədəki oyun – 0:1

Turnir cədvəli

	Klub	o	q	h	m	t	x
1	Olimpik	21	16	5	0	27-4	53
2	Neftçi	21	14	5	2	37-16	47
3	İnter	21	13	4	4	39-16	43
4	Xəzər-Lənkəran	21	12	7	2	38-15	43
5	Simurq	21	9	5	7	28-21	32
6	Qəbələ	21	10	1	10	27-25	31
7	Qarabağ	21	8	6	7	20-16	30
8	Bakı	21	7	8	6	29-22	29
9	Masallı	21	6	4	11	22-36	22
10	Karvan	21	6	4	11	20-25	22
11	Standard	21	5	7	9	24-22	22
12	Turan	21	3	5	13	14-36	14
13	ABN	21	2	6	13	11-36	12
14	Gənclərbirliyi	21	2	1	18	13-59	7