“Palermo” bu mövsüm 4-cü məşqçisi ilə yollarını ayırdı

11.03.2013 - 23:33

İtaliya A seriyasının son pillələrində qərarlaşan “Palermo”da növbəti məşqçi istefası reallaşıb. Apasport.az saytının məlumatına görə, fevral aynın 24-də komandanın “sükanı arxasına” gətirilən Can Pyero Qasperini mövsümdə 2-ci dəfə “Palermo”nu tərk edib.

Tərəflər arasında müqavilə qarşılıqlı razılıq əsasında ləğv edilib. Qasperininin gəlişindən sonra o, İtaliya klubunu 2 dəfə meydana çıxarıb. Səfərdə “Torino” ilə (0:0) heç-heçə, evdə isə “Syena”ya 1:2 hesabı ilə məğlub olub.

Qeyd edək ki, 55 yaşlı mütəxəssis sentyabrın 16-da baş məşqçi postunda Cüzeppe Saninonu əvəz etmişdi. Fevralın 4-də isə Can Pyero qovulmuşdu. 20 gün sonra isə o, yenidən Alberto Malezaninin əvəzinə komandanın “sükanı arxasına” gətirilmişdi.